ليه المشاعر الإنسانية شىء معقد جداً ؟
وارد إن يكون المفهوم المغروس جوانا كلنا كثقافة مجتمع فى طريقة تعاملنا مع مشاعرنا هو اللى معقد ..لكن المشاعر فى حد ذاتها أبسط من كدة..وارد أوى !
زميلة ليا من أيام ثانوى بتحب الكتابة ..كانت مؤخراً كاتبة تحليلها لحب البنات المتزايد بصورة لافتة مؤخراً لأم كلثوم و فيروز- و دة أمر ممكن تلاحظه بسهوله لو ليك حساب شخصى ع الفيس بوك - قالت فى تحليلها أنهم ببساطة بيجيدوا التعبير فى أغنياتهم عن مشاعر صعب أوى تلاقيها فى أغانى حد تانى ،عن الوصال و الهجر و بساطة الجمل التى بتوصف المشاعر بسلاسة و عمق فى نفس الوقت ..فتخليك تقول وراهم أه والله ..أه والله ..أه والله !
طب بلاش فيروز و أم كلثوم لو مالكش فى الكلاسيكيات..ليه أغنية شيرين بتاعة مسلسل غادة عبد الرازق حققت نسبة الإستماع الرهيبة دى -على حد علمى فى إحصائية ما قريتها أنها كانت أول أغنية عربية تحقق نسبة استماع عالية على اليوتيوب - ايوة الأغنية بتاعة يادى يادى يادى المشاعر ، و اللى لا إراديا ً بحب أغنيها يادى يادى يادى "النيلة " ع المشاعر لأنى بحسها كدة أدق و معبرة أكتر .
المشاعر فعلاً شىء معقد جداً ..كم اللخبطة اللى بتعكسها كلمات أغنية شيرين مثال حى عاكس لكم اللخبطة اللى الواحد ممكن يعيشها فى مشاعره : اللى ايده فى ايد حبيبه بس مش حاسس مشاعر..اللى بيفكر يفارق بس لولا المشاعر..اللى غرب نفسه سافر من آلام المشاعر..إلى أخر ذلك من كلمات الأغنية اللى بتثبت أن المشاعر خليط عجيب غريب مريب من الحاجات المختلطة اللى قد لا تكون مفهومة لصاحبها اللى بيمر بيها شخصياً ..ماشى ..عادى ..غالبا ً قد لا تكون المشاعر مفهومة لصاحبها فعلاً لأنها ببساطة إحساس ربنا بيحطه ف قلبك تجاه شخص ..و تيجى أنت تجيبها بالمنطق..تمشيها يمين شمال..تحاول تفهم إيه اللى خلاك تتعلق بالشخص دة رغم أن قد يكون اللى انت عارفه عن نفسك لا يتضمن تكوين و تركيب الشخص دة ..عهدك بنفسك مبيقولش انك ممكن تنجذب للمواصفات دى لكن بتلاقيه حصل..عادى المشاعر شىء غامض و معقد و لا يمكن للمنطق الإنتصار عليها ..و بالتالى محاولة استرسالى فى النقطة دى ضد الطبيعة .
طب على سياق غير عاطفى ..ليه المشاعر أمر بيتم التعامل معاه بأنه شىء لا يفضل الإفصاح عنه يعنى ؟
يعنى إيه جملة واحدة يجى فيها سياق غير عاطفى و مشاعر ..يعنى ليه ممكن تحس انك مش قادر تعبر لحد لا يجمع بينكوا شىء عاطفى انك بتحترمه..بتقدره..بتعزه..كلكعة مشاعرنا بتوصل أحياناً إنك تتكسف تحضن أبوك أو أمك أو تقولهم بمنتهى البساطة ..بحبكوا أوى..تتكسف تقول لأقرب صحابك انا معرفش أعيش من غيركوا ..
الفكرة الأسوأ لما يكون الموضوع مش كسوف..ولما يكون خوف ان تصريحك بمشاعرك دة إنتقاص منك ..و الخوف يتحول لقناعة راسخة ..و مع الوقت تتحول جواك القناعة دى لشىء من المسلمات اللى بتعيش طول عمرك بيها ..المشكلة الأكبر و الأكبر و الأكبر على الإطلاق هو تطور كلكعة المشاعر جواك من مجرد عدم قدرة عن التعبير تجاه الناس اللى حواليك وصولاً لشريك حياتك..ودة شىء عايشته فى ميت تجربة حواليا ..و بشوف إنه أمر طبيعى جداً..ماهو الأمور اللى طول الوقت بتمارسها بشكل غير سوى..مستحيل فجأة هتقدر تطبقها بشكل سوى و طبيعى مع شريك حياتك ..أقسى مثال لكلكعة المشاعر شفته فى حياتى إن اتنين " متجوزين" بيخبوا مشاعرهم عن بعض خوف من إن الطرف التانى يعتبر كدة ان دة شىء يخليه مضمون ! هل فى مثال لتشوه الفكرة فى دماغنا أكبر من كدة..ان الناس تفتكر ان عدم تعبيرها أصلاً عن مشاعرها للطرف التانى هو وسيلتها للحفاظ علي العلاقة بينهم ؟!
السؤال دلوقتى بيقول ..هى مش الحياة من غير المعانى البسيطة جداً دى مجرد استمرار ملهوش أى معنى ؟!
طب بصياغة أخرى ..انت ايه اللى ممكن يشدك من الوقوع فى كل أجواء الضغط اللى الواحد عايشها دى غير الرفايع دى ..الرفايع البسيطة اللى لا تنتقص منك أى شىء طالما بتتم فى إطارها السليم ؟!
و دفعاً لأى ظن خاطىء ..على الصعيد العاطفى مقصدش ان المطلوب التعبير عن المشاعر كل دقيقتين ..لكن ان المفهوم نفسه يكون موجود بس ..ما يبقاش مشوه إنه مينفعش أصلاً انك تعبر عن طبيعة إحساسك .
و دفعاُ برضه لأى ظن خاطىء ..مأساة كلكعة المشاعر لا تنحصر فى الجانب العاطفى بس..دى دواير شابكة فى بعضها و بتوصل لبعضها..على كل الأصعدة..ممكن حتى توصل لعدم قدرتك التعبير عن احساسك ناحية موضوع معين.. مشاعرك ناحية موضوع معين ..هى دواير شابكة ف بعضها لو متطبقتش على الصغيرة ..عمرك ما هتقدر تطبقها ع الكبيرة !
و تلخيصاً لكل الرغى اللى فوق دة : .يادى يادى يادى النيلة ع المشاعر !
